Guddoomiyaha gobolka Nugaal ee maamulka Puntland Cabdisalaan Xassan Xirsi (Gu’jir) oo shir jaraa’id ku qabtay Garowe ayaa codsi iyo digniin isugu daray madaxda dowlada federaalka.
Gu’jir ayaa Ra’isul Wasaaraha Soomaaliya Xasan Cali Kheyre ka dalbaday inuu fuliyo balan-qaadkiisii ahaa in Xukuumadiisu ka qeyb qaadanayso dhismaha garoonka kubadda cagta ee Garowe.
“Kheyre markii uu yimid Garowe 1-dii Agoosto 2018 wuxuu balan-qaaday inuu garoonka kubada cagta Mirre Awaare dhigayo Roog, balan-qaadkaas wax ka fulay ma jiraan illaa hadda, Ra’iisul wasaaraha waxaan ka codsanaynaa inuu ka dhabeeyo” ayuu yiri Guddoomiyaha gobolka Nugaal.
Cabdisalaan Xassan Xirsi (Gu’jir) ayaa dhinaca kale dowladda Federaalka uga digay inay ka waan-towdo dad uu sheegay in siyaasad khaldan loogu soo diro gobolka Nugaal, kuwaasoo buu yiri iska horkeenaya shacabka iyo dowladda Federaalka.
“Dowladda Federaalka, gaar ahaan Ra’iisul wasaare Kheyre waxaan u soo jeedinayaa, dadka ay arrimaha siyaasada u soo dirsanayaan oo gobolka Nugaal ka jeeda inay ka waan-toobaan, wax walba nidaam iyo waddo loo soo maro ayay leeyihiin, waa in loo soo maraa, Wasiirada iyo Xildhibaanada la soo dirayo iyo dadka halakan jooga shaqo iskuma leh” ayuu yiri gudoomiyaha.
Xiriirka dowlada federaalka iyo maamulka Puntland ayaan wanaagsaneyn in muddo ah ka dib markii maamulkaas iyo maamulo kale ay sheegeen iney xiriirka u jareen dowlada iyagoo ka tabanaya waxyaabo kala duwan.
Xafiiska Shabakada Allbanaadir.com
Muqdisho Somalia
Allbanaadir@live.com
