Taliyaha Ciidanka Xoogga Dalka Soomaaliyeed S/gaas Ibraahim Sheekh Muxudiin oo uu wehliyo taliyaha Ciidanka Dhulka Jeneraal Dayax Cabdi Cabdulle iyo saraakiil kale oo ka tirsan Taliska Xoogga ayaa maanta kormeer ku tegay taliska cusub ee loo diyaarinayo ciidanka dhulka.
Xaruntan oo lagu magacaabo Kabka ayaa ku dhex taalla dhismaha Ex-Kulliyadda ciidamada Jaalle Siyaad ee degmada Hodan, waxaana ka socda dhisme iyo diyaarin xoog leh.
Taliyaha ayaa kormeeray qeybaha kala duwan ee xerada, waxaana uu hubiyay sida ay ugu diyaarsan tahay in lagu leyliyo askar cusub oo kamid noqonaya ciidanka xoogga dalka.
“Waxaan maanta kormeer guud ku sameynay xarunta Taliska ciidanka dhulka Xoogga Dalka Soomaaliyeed oo dhawaan dib u habeen casri ah ku bilaawnay, waxaana naga go’an inaan qalabeyn iyo dib u dhis intaba ku sameyno goob kasta oo Ciidanka XDS uu ku shaqeeyo” ayuu yiri taliyaha
