Guddoomiyaha Hay’adda Maareynta Musiibooyinka Soomaaliyeed Maxamuud Macallin Cabdulle, ayaa shir guddoomiyay kulan wax ku ool ah oo ay qeyb ka ahayeen ku-xigeenka ergayga gaarka ah ee Qaramada Midoobay George Conway iyo madaxa xafiiska UN-OCHA ee Soomaaliya Crispen Rukasha oo ay weheliyaan kooxo farsamo oo ka kala socday hay’adaha UN-OCHA iyo SoDMA.
Kulanka ayaa diiradda lagu saaray xoojinta dadaallada iyo isku-duwidda howlaha gurmadka, wax ka qabashada caqabadaha la xiriira leexsashada gargaarka, gacan ka geysiga arrimaha xasilinta, wax-ka-qabashada caqabadaha la diiwaan galiyay iyo in SoDMA ay noqoto isku-duwaha hoggaanka u ah dadaalka xasilinta degdegga ah si loo helo hufnaan.
Sidoo kale, waxaa kulanka looga wada-hadlay dar-dar galinta iyo isku-dubbaridka howlaha Madasha bani’aadannimda dalka taasoo dhawaan dhici doonta, kana soo qeyb galayaan deeq-bixiyayaasha, Wasaaradaha Dowlad gobolleedyada ee ka shaqeeya gargaarka iyo guud ahaan hay’adaha ku lugta leh arrimaha bani’aadannimo, waxaana la muujiyay muhiimadda ay leedahay helidda waxqabad midaysan iyo qorshe dhammaystiran.
