Madaxweynaha Dowladda Puntland Mudane Siciid Cabdullaahi Deni ayaa booqday xarunta la socodka Doorashada Goleyaasha deegaanka ee sadexda degmo ee Garoowe, Dangoroyo iyo Godob-jiiraan oo ku taal hotel Martisoor.
Madaxweynaha oo khudbad ka jeediyey madasha ayaa u mahadceliyay Guddiga Doorashooyinka iyo Howlwadeennada la shaqeeyay, Laamaha Amniga , Warbaahinta iyo Gorjoogtada kala duwan.
Shacabka degmooyinka Garoowe, Dangorayo iyo Godobjiiraan ee gobolka Nugaal ayaa saaka u dareerey doorashada qof iyo cod ee golayaasha deegaanka Puntland sida lagu sheegay war ka soo baxay guddiga doorashooyinka golaha deegaanka ee PEC.
Doorashooyinka ayaa ka dhacaya 80 goobood oo ka kala tirsan saddexda degmo ee gobolka Nugaal, iyadoona ay codeynayaan in ka badan 64 kun oo qof oo kala xulanaya 431 musharax oo ka kal socda 8 xisbi siyaasadeed.
Maamulka Puntland ayaa horey u qabtay doorashada 33 degmo oo golaha deegaanka ah, iyadoona saddexdaan degmo ay noqonayaan kuwii ugu dambeeyay.
