Ra’isul Wasaarihii hore ee Somalia Xassan Cali Khayre ayaa xaalada argagax iyo uurkutaalo leh ku sifeeyey waxa ka socda qabuuraha Iskolo Buluusiyo ee Magaalada Muqdisho oo dowlada ay amartay in meydadka ku aasan lagala baxo.
Qabuurahan ayaa waxaa ku aasan kumanaan qof oo ay ku jiraan saraakiil ciidan, siyaasiyiin fanaaniin iyo dad kale oo magac ku leh bulshada, waxaana arrimtan oo aad loo cambaareeyey ay saacadihii ugu dambeeyey qabsatay baraha bulshada
HOOS KA AKHRISO QORAALKA KHAYRE UU SOO SAARAY
Waxaan aad uga damqanayaa, jirkeyguna la jiriricoonayaa amarka ka soo baxay Dowladda Soomaaliya ee lagu amray in la faago meydadkii ku aasnaa qubuuraha Iskool Polizia. Waa amar gurracan iyo fal argagax leh oo ceeb iyo cambaar ku ah madaxda dalka iyo guud ahaan dowladnimada Soomaaliyeed, taariikhdana ka geli doono baal mugdi ah.
Waxaa xusid mudan in mowtada qubuurahaas ku aasan ay u badan yihiin masuuliyiin dowladeed iyo saraakiil ciidan oo dalkan naftooda u soo huray, halkaasna loogu aasay duruufo amni. Waana nasiibdarro in maanta loogu abaalgudo in ehelladooda lagu qasbayo in ay faagaan qabriyadooda, lacagna looga qaato in ay meydadka la baxaan.
Waxaan qoysaska iyo ehellada dadka qubuurahaas ku aasan uga tacsiyeynayaa falkan uur-ku-taallada ah. Waxaana madaxda dalka ugu baaqayaa in la xurmeeyo meydadka, si degdeg ahna loo hakiyo fulinta amarkan gurracan, raalligelin buuxdana la siiyo ehellada mowtada iyo guud ahaan shacabka Soomaaliyeed ee la anfariirsan warkan dhiillada leh.
