Iska horimaad hubeysan oo dhexmaray ciidamada dowlada iyo dabley ka tirsan Al-Shabaab ayaa xalay saqdii dhexe ka dhacay degmada Heliwaa ee gobolka Banaadir.
Sida warku sheegayo iska horimaadka ayaa bilowday ka dib markii dableyda hubeysan ay weerareen saldhig ciidamada dowladu ku leeyihiin Ex-Shineemo Cabdi Waayeel oo ku dhow Isbitaalka SOS.
Gantaalaha garabka laga rido ee baasuukaha loo yaqaan iyo rasaas ka dhaceysay hubka fudud ayaa la isku weydaarsaday iska horimaadkan oo socday muddo kooban.
Qaar ka mid ah dadka degaanka ayaa sheegay iney cabsi soo wajahday intii uu socday iska horimaadkan, ayna ka walaaceen in hubka la isweydaarsanayey uu guryahooda ugu tago.
Xaalada degmada heliwaa ayaa saaka degan, lama oga khasaaraha ka dhashay iska horimaadkii xalay mana jiro war ka soo baxay saraakiisha dowlada iyo kuwa Al-shabaab oo la xiriira iska horimaadka xalay.
Xafiiska Shabakada Allbanaadir.com
Muqdisho Somalia
Allbanaadir@live.com
