Howlgal qaatey muddo 24 saacadood oo ay sameeyey ciidanka Boliiska Soomaaliyeed gaar ahaan ciidanka saldhigga Dharkeynlay waxaa gacanta lagu soo dhigey gacanku dhiigle laga daba joogey.
Taariikhda markay aheyd 09-05-2024 abaaro 10:00am waxaa dhaawac toorey loo geystey muwaadin Soomaaliyeed oo lagu magacaabo dhibane marxuum Ismaaciil Yuusuf Axmad Ina Muumino Maxamed Cumar 40 jir ah saacado ka dibna dhibanaha wuxuu u geeriyoodey dhaawicii ka soo gaarey tooreydii uu la dhacay gacan ku dhiiglaha
“Maanta oo taariikhda tahay 10-05-2024 waxaa gacanta lagu soo dhigay eedeysane gacan ku dhiigle Cali Maxamed Xassan ina Suldaano Cali Aadan 16 jir ah kaasoo howlgalka lagu baadi goobaayey ay ku jireen ciidanka Boliiska Soomaaliyeed muddo 24 saacadood ah” ayaa lagu yiri war ka soo baxay Booliska.
Waxaa howlgalkaas gacan ka geystey bulshada Soomaaliyeed ee degan degmada Dharkeynlay oo gacan siiyey ciidanka boliiska Soomaliyeed sida lagu sheegay qoraalka Booliska.
