Dowladda Soomaaliya ayaa shaacisay in weerar dhinaca cirka ah oo laga fuliyay deegaanno dhaca xadka gobolada Galgaduud iyo Shabeelaha Dhaxe lagu beegsaday dagaallamayaal katirsan kooxda Al Shabaab.
Sida ay baahiyeen warbaahinta afka dowladda ku hadasha weerarka dhinaca cirka ah ayaa lala beegsaday dhul keymo ah ay ku dhuumaaleesanayeen kuna sugnaayeen dagaalyahanno katirsan Al Shabaab .
Weerarka dhinaca cirka ah ee lagu qaaday Al Shabaab ayaa si gaar ah uga dhacay halka loo yaqaano Jir jir farey iyo Burka fiiqey oo dhanka waqooyi kaga beegan degmada Ruunirgood ee gobolka Shabeelaha Dhaxe.
Warbaahinta dowladda ayaa sheegtay in weerarkan lagu dilay xubno badan oo katirsanaa kooxda Al Shabaab, waxaa sidoo kale weerarkan lagu gubay gaadiid nuuca dagaalka ay lahaayeen Al Shabaab.
Diyaaradaha dagaalka ee caawiya dowladda Soomaaliya ayaa marar badan duqeymo dhinaca cirka ka fulisay deegaanno iyo goobo ay joogaan Al Shabaab, waxaana duqeymaha qaar lagu dilay saraakiil iyo xubno badan oo katirsan Al Shabaab.
Xafiiska Shabakada Allbanaadir.com
Muqdisho Somalia
Allbanaadir@live.com
