Maamul goboleedka Somaliland oo isku heesta dal madax bannaan ayaa sheegay in dastuurka cusub ee shalay xildhibaannada labada Aqal ee Baarlamaanka Federaalka ansixiyeen uusan waxba ka khuseyn.
Wasiirka Warfaafinta maamulka Somaliland Cali Xasan Maxamed (Cali Mareexaan) ayaa sheegay in maamulkooda uusan qeyb ka aheyn wax ka bedelka dastuurka Soomaaliya lagu sameeyay waligoodna aysan qeyb ka noqon dastuurka.
Waxa uu sheegay wasiirka in dowlada Soomaaliya ay hadda kahor aaminsanayd in Somaliland oo maqan aan dastuur la samayn karin, lakiin ay hadda samaysteen dastuur u gaar ah, oo ay soo afjareen doodoodi hore.
Cali Mareexaan ayaa intaa ku daray in ansixinta wax ka bedelka dastuurka ay ku sameeyeen Baarlamaanka Soomaaliya ay hadda ka dhigan tahay in Soomaaliya u aqoonsatay Somaliland dal madax bannaan.
“Waxa ku cusub ee soo kordhayna waxa weeyaan uun in wixii ay iskugu sheekayn jireen ee ay odhan jireen Somaliland ayaa la sugaya ay soo afjareen, oo ay yidhaahdeen awrkiinu haku qaado oo ay ku tashadeen intooda iyo dalkooda” ayuu yiri Wasiir Cali Mareexaan.
Xildhiobaanada labada Aqal ku matela Baarlamaanka Federaalka gobolada waqooyi ee Somaliland ayaana qeyb ka ahaa xildhibaanada ansixiyay wax ka bedelka dastuurka cutubyo kamid , taas oo ka dhigan in Somaliland ay mataleen xildhibaannadaasi.
Xafiiska Shabakada Allbanaadir.com
Muqdisho Somalia
Allbanaadir@live.com
