Hoggaamiye Cabdiqaadir Axmed Aw-Cali ayaa ka qaybgalay Isusoobax Bulsho oo Shacabka Magaalada Laascaanood ay ku taageerayeen Ciidamada Difaaca SSC-khaatumo, adkaynta Amniga Caasimadda, kobcinta Dhakhliga iyo kor u qaadista canshuur-bixinta.
Ugu horeyn Hoggaamiyaha ayaa ku ammaanay shacab weynaha SSC-Khaatumo sida ay markasta u garab taagan yihiin Maamulkooda, sidoo kale Hoggaamiyaha ayaa bogaadiyay Ciidamada Difaaca SSC-Khaatumo oo ah geesiyaasha shacabka reer SSC-Khaatumo ay dartood u haystaan Nabadda iyo Amniga.
Hoggaamiyaha ayaa shacabka la wadaagay in Maamulka Somaliland iyo Muuse Biixi ay qorsheynayaan colaad iyo weerar ay ku soo qaadaan deegannada SSC-Khaatumo mar kale, isagoona ugu baaqay shacabku inay is garabtaagaan ciidanka Difaaca oo ah.
Hoggaamiyaha ayaa ugu baaqay Dawladda Federaalka Soomaliya in doorkeeda ka qaadato sidii loo difaaci lahaa Midnimada Jamhuuriyadda Soomaliya taasoo Maamulka Soomaliland u taagan yahay kala-goynteeda.
Dhanka kale, Hoggaamiyaha ayaa xusay in Beesha Caalamku ay indhaha ka daawanayeen denbiyada dagaal ee Muuse horey u galay iyo colaadaha uu hurinayo wakhtigan, Hoggaamiyaha ayaa sheegay cawaaqib xumada ka dhalataa colaadaha Muuse hurinayo ay Masuuliyaddeeda qaadayaan ciddii soo qaaaday.
Hoggaamiyaha ayaa ugu baaqay Ciidamamada Difaaca SSC-khaatumo, Shacabka, Qurbajoogta, Ganacsatada, Culimada, Haweenka iyo Dhalinyaradaba SSC-Khaatumo in ay u diyaar garoobaan dagaal iyo sidii ay u difaaci lahaayeen dalkooda, dhammaantoodna isaga xaadirinlahaayeen furimaha hore ee Maamulka SSC-Khaatumo.
Dhinaca kale, oggaamiyaha maamulka SSC-Khaatumo, Cabdiqaadir Axmed Aw-cali Firdhiye ayaa uga digay dowladda Itoobiya inay soo faro galiso arrimaha gudaha ee degaanada maamulkiisa.
Hoggaamiye Firdhiye ayaa sheegay inay jiraan warar sheegaya in ciidamo Itoobiyaan ah la dul keenayo degaanada SSC uu ka arrimiyo maamulkiisa.
“Waxaanu aqbali karayno ma ahan, ma aqbalayno. Dadkayaga iyo dalkayaga annagaa ka masuul ah. In ciidamo kale la dulkeeno ama lasoo fara galiyo, ma aqbalayno, waana ka dagaalamaynaa,” ayuu yiri
