Dagaallamayaal katirsan kooxda Al Shabaab ayaa xalay weerar madaafiic loo adeegsaday ku qaaday degmada Ceeldheer ee gobolka Galgaduud, halkaas oo fariisin u ah ciidanka dowladda iyo kuwa dadka deegaanka.
Sida aan wararka ku helnay kooxda Al Shabaab ayaa xalay saqdii dhaxe weerar hoobiyaal loo adeegsaday ku qaaday degmada Ceeldheer, waxa ayna madaafiicda ku dhaceen bannaanka magaalada intooda badan.
Ciidanka dowladda ee ku sugan degmada Ceeldheer ayaa dhankooda jawaab ka bixiyay weerarka Al Shabaab kusoo qaadeen, waxa ayna hub culus ku garaaceen aaga Al Shabaab kasoo tuureen madaafiicda.
Saraakiisha ciidanka dowladda ee ku sugan degmada Ceeldheer ayaa sheegay in ay iska difaaceen weerarka Al Shabaab kaga yimid, waxa ayna xuseen in aysan jirin khasaaro weerarkaasi kasoo gaaray ciidanka.
Ciidanka dowladda iyo kuwa dadka deegaanka ayaa ku sugan degmada Ceeldheer ee gobolka Galgaduud, degmadaasi ayaana kamid ah goobihii kooxda Al Shabaab looga saaray howlgalladii ugu dambeeyay ee gobolkaasi ka dhacay.
Xafiiska Shabakada Allbanaadir.com
Muqdisho Somalia
Allbanaadir@live.com
