Wasiirka Arrimaha Dibadda ee Iran, Hossein Amir-Abdollahian ayaa la kulmay hogaamiyaha Hezbollah Hassan Nasrallah si ay uga wadahadlaan ” horumaradii ugu dambeeyay ee siyaasadeed iyo amni ee gobolka, gaar ahaan Marinka Gaza, koonfurta Lubnaan, sida laga soo xigtay Wakaaladda Wararka Qaranka ee Lubnaan (NNA).
Hogaamiyaha Xisbullah iyo diblomaasiga ugu sareeya Iran ayaa kulanki ugu dambeeyay kulmay bishii November ee sanadkii hore halkaas oo ay kaga wada hadleen “suurtagalnimada jira ee ku saabsan koorsada dhacdooyinka iyo dadaalada lagu joojinayo gardarrada Israel ee Gaza.”
Tan iyo markii Xamaas ay bishii Oktoobar 7-dii weerartay Israa’iil iyo weerarradii Israa’iil ee Qaza ee xigtay, kooxda xagjirka ah ee Hezbollah waxay weeraro joogto ah la beegsaneysay ciidammada Israa’iil ee ku sugan xadka Lubnaan iyo Israa’iil.
Wasiirka arrimaha dibadda ee Iran, Hossein Amir-Abdollahian, ayaa Sabtidii ku baaqay in xal siyaasadeed lagu dhameeyo dagaalka Gaza, wuxuuna sheegay in Tehran ay wada hadalo dublamaasiyadeed kula jirto Riyadh si ay arrintan uga wada shaqeeyaan.
“Gobolku waxa uu u socdaa dhanka xasiloonida, amniga iyo xalalka siyaasadeed,” ayuu Amir-Abdollahian ku sheegay shir jaraa’id oo uu ku qabtay magaalada Beirut ee dalka Lubnaan. “Waxaan bilowgiiba ku dhawaaqnay in dagaalku aanu xal noqon doonin.”
“Dhammaadka dagaalka waxay la macno tahay dhamaadka Netanyahu iyo golahiisa wasiirada ee xagjirka ah,” ayuu yiri wasiirka arrimaha dibadda ee Iran, isagoo sidoo kale uga digay Israa’iil inay dagaal toos ah ku qaado Lubnaan.
