Waxaa shalay ilaa hadda baraha bulshada iyo warbaahinta heesata hadal heynta geerida allaha u naxariistee Luul Cabdicasiis Maxamed oo aheyd hooyo korsaneysay lix carruur oo agoon ah, taa uu nolosha uu dhaafiyay dabna qabadsiiyay ninkii iyada qabay.
Ninkii falkaasi dilka arxan darada ah u geestay xaaskiisa ayaana wali lagu soo dhigin gacanta, waxaana la sheegay in ninkan oo garab ka helaya xubno katirsan qoyskiisa uu ku dhuumanayo qeybo kamid ah Muqdisho.
Xildhibaan Cabdiraxmaan Cabdishakuur Warsame ayaa dilka Luul Cabdicasiis ku tilmaamay fal aad looga argagaxo, waxa uuna fal dambi oo ka baxsan xeyndaabka bini’aadannimada ku tilmaamay dilka ninkan u geestay xaaskiisa oo xaamilo aheyd.
”Dilka bahalnimada ah ee uu ninkeeda u geystay Allaha u naxariistee Luul C/casiis Maxamad wuxuu argagax ku riday bulshada oo idil. Inaad dab qabadsiiso xaaskaada oo xaamilo ah oo lix caruur oo agoon ah u xoojisa waa faldanbi ka baxsan xayndaabka bani’aadannimada” ayuu yiri Cabdiraxmaan Cabdishakuur.
Xildhibaanka ayaana uu baaqay ciidamada booliiska iyo laamaha kale ee amniga in ay soo qabtaan eedeysnaha baxsadka ah ayna la socodsiiyaan bulshada tallaabooyinka ay qaadeyn si ay u xasilaan bulshada ka argagaxday dilka Luul.
Ehelada marxuumad Luul Cabdicasiis ayaa sheegay in aysan marnaba aaseyn meydka marxuumada ilaa laga soo qabto caddaaladana la horkeeno ninkii qabay ee dilka u geestay, kaa oo ka baxsanaya caddaalada.
Xafiiska Shabakada Allbanaadir.com
Muqdisho Somalia
Allbanaadir@live.com
