Madaxweynihii hore ee Soomaaliya Maxamed Cabdullaahi Farmaajo ayaa qoraal uu soo saaray kaga hadlay waxyaabihii uu kala hadlay madaxweynaha Soomaaliya Xasan Sheekh oo dhawwaan ku kulmeen magaalada Doha.
Farmaajo ayaa sheegay in Xasan Sheekh kala hadlay muhiimadda ay leedahay inuu hoggaamiyo wadatashi heer qaran ah oo lagu wajahayo xaaladaha taagan ee la xiriira wax ka beddelka dastuurka,qaab dhismeelka maamul ee dalka iyo khataraha ku gedaaman madaxbannaanida iyo midnimada dalka, taas oo ah jidka keliya ee furan in la qaado.
Dhinaca kale Madaxweyne hore Farmaajo ayaa soo dhaweeyay shirka ka dhacaya magaalada Garawe ee looga tashanayo arrimaha khilaafka ka jiro, waxa uuna ugu baaqay madaxda dalka in ay ka qeyb galaan shirkan oo muhiimad weyn leh sida uu tilmaamay.
”Waxaan soo dhoweynayaa shirka Garoowe ee looga tashanayo arimaha hortebinta u leh dalka, aniga oo madaxdii hore ee dalka iyo kuwa xilka haya ugu baaqaya in ay ka qayb galaan shirkaas oo ah mid muhiimad weyn u leh dalka oo xilligan maraya marxalad xaasaasi ah” ayuu yiri Farmaajo.
Farmaajo ayaa usoo jeediyay labada Gole ee Baarlamaanka iyo Xukuumadda in inta uu shirkaasi socdo ay ka fogaadaan tallaabooyinka aan la isku waafaqsanayn ee la xiriira laalidda dastuurka iyo wax ka beddelka hannaanka maamul ee dalka.
”Ma jirto xilli uu dalkeennu uga baahi badan yahay in aynu u midowno ka hortagga xasillooni darro gudaha ka timaadda iyo sidii aynu dadkeenna iyo dalkeenna uga difaaci lahayn khatarta dibadeed ee aynu wajahayno, meelna la iska dhigo tallaabooyinka kala qaybsanaanta siyaasadeed u horseedaya dalka” ayuu yiri Farmaajo.
Hadalka madaxweyne hore Farmaajo ayaa kusoo aadaya xilli madaxweynaha Puntland Siciid Deni iclaamiyay in shir ay isugu imaanayaan madaxda sare ee dalka iyo kuwa maamul goboleedyada, shirkaasi oo looga hadli doono arrimo xasaasi ah oo taagan.
Xafiiska Shabakada Allbanaadir.com
Muqdisho Somalia
Allbanaadir@live.com
