Kooxo biskoolado ku hubeysan ayaa goordhaw agagaarka Ex-koontarool Afgooye ku dilay masuul katitsanaa maamulka degmada Dharkeenley ee gobolka Banaadir, waxaana dilka kaddib baxsaday kooxdii ka dambeysay falkaasi dilka ah.
Sida aan wararka ku helnay dhallinyaro biskoolado ku hubeysnaa ayaa qaarka sare ee jirkiisa rasaas kala dhacay Xassan Cali Gacal( Moosow) oo ahaa madaxa fasaxyada dhismaha iyo sidoo kale gacan yaraha guddoomiyaha degmada Dharkeenley.
Goobjoogayaal goobta dilku ka dhacay ka agdhawaa ayaa sheegay in Xasan Moosow la dilay xilli uu kasoo baxay gurigiisa kuna sii jeeday goobtiisa shaqada, waxa ayna tilmaameen in dilka geesteen saddex nin oo dhallinyaro ahaa.
Ciidamada ammaanka ayaa gaaray goobta dilka uu ka dhacay, waxa ayna ciidamada halkaasi ka sameeyeen baaritaano aan lagu guuleysan in lagu soo qabto raggii dilka geestay oo goobta si deg deg ah uga baxsaday.
Ammaanka magaalada Muqdisho ayaa muddooyinkii dambe soo haggaagayay, waxaana aad u yaraa dilalka ay geestaan kooxha ahubeysan, waxaana magaalada si weyn uga howlgalayay ciidamo katirsan Nabad Sugidda Soomaaliya.
Xafiiska Shabakada Allbanaadir.com
Muqdisho Somalia
Allbanaadir@live.com
