Guddoomiyihii hore ee Baarlamaanka Federaalka Soomaaliya Maxamed Sheekh Cusmaan Jawaari ayaa si kulul uga soo horjeestay heshiiskii uu madaxweynaha maamulka Somaliland u saxiixay dowladda Itoobiya.
Jawaari ayaa sheegay in madaxweynaha Somaliland uu galay qiyaano Qaran, waxa uuna ugu baaqay xeer ilaalinta Qaranka in shaqadooda qabsadaan oo soo xiraan Muuse Biixi uu ku tilmaamay dambiile galay qiyaano Qaran oo weyn.
“Xeer ilaaliyaha guud muxuu qabanayaa? ma haboon tahay in dacwad lasoo oogo ha yimaado ama yuusan imaan, maxkamadna la geeyo isaga oo maqan xittaa waa la xukumi karaa kadibna meesha lagu arko ayaa laga soo qabanayaa” ayuu mar kale yiri Jawaari.
Waxa uu sheegay Jawaari in qiyaano Qaran qofkii ku kaca marka loo eego xeerka ciqaabta Soomaaliyeed in xukunkiisa uu yahay dil , waxa uuna tilmaamay falka uu Muuse Biixi ku kacay uu Itoobiya ku siiyay dhul Soomaaliyeed ay tahay qiyaano Qaran oo weyn.
“Xeerka ciqaabta Soomaaliyeed wuxuu qorayaa qof alla qofkii gobonimada Soomaaliyeed qayb kamid ah ama kulligeeda hoos geeya dowlad kale oo ajnabi ah wuxuu ku kacay Khiyaano Qaran, xukunkeedana waxaa waayey dil” ayuu yiri guddoomiye hore Jawaari.
Guddoomiyihii hore ee Baarlamaanka Federaalka Soomaaliya ayaa sheegay in kiiskan uu galay Muuse Biixi aysan u baahneyn caddeymo badan uuna isagu qiraal ka yahay uuna ku faanayo in dhul Soomaaliyeed cadawga Itoobiya u saxiixay in ay qaataan.
Jawaari ayaa ugu dambeyn ugu baaqay shacabka Soomaaliyeed in ay iska diidaan damaca dowladda Itoobiya ee ku aadan in ay qaataan dhulka Soomaaliya, isagoona dhinaca Somaliland shacabkeedana ugu baaqay in arrintan ka dhiidhiyaan.
Xafiiska Shabakada Allbanaadir.com
Muqdisho Somalia
Allbanaadir@live.com
