Dowlada Mareykanka ayaa War ka soo saartay heshiiska is afgaradka ah ee dhexmaray dowlada Itoobiya iyo maamulka Somaliland
Heshiiskan ayaa dhigaya in Itoobiya ay Somaliland u aqoonsato dal ka madax banaan Somalia, taas bedelkeedna laga kireeyo dhuul badeedka Somaliland qeyb ka mid ah.
Afhayeen u hadlay Wasaarada arrimaha dibeda ee Maraykanka ayaa sheegay in ka dawlad ahaan ay aqoonsan yihiin gobonnimada, midnimada iyo madax-bannaanida dhuleed ee dawladda Federaalka Soomaaliya oo ay ku jiraan xuduudihii 1960kii.
Mareykanka ayaa horey heshiisyo iskaashi ula galay Somaliland inkastoo ay sheegeen ineysan u aqoonsaneyn dal madax banaan oo ka go’ay Somalia.
Dawladda Soomaaliya ayaa is-afgaradka ku tilmaantay mid xadgudub ku ah qarannimada iyo midnimada dhuleed ee Soomaaliya, waxaana Soomaaliya ay u yeeratay safiirkeedii Itoobiya.
La-taliyaha amniga qaranka ee Ra’iisul Wasaaraha Itaoobiya Redwan Xuseen ayaa ku sheegay bartiisa X in in is-afgaradku yahay “tallaabo loo qaaday jihada saxda ah.”
Waxa uu sheegay in dawladda federaalka Itoobiya is-afgaradka ay la gaadhay Somaliland uu u gogolxaarayo inay Itoobiya hesho saldhig milatari oo ay ka kiraysato Somaliland.
Midowga Yurub iyo ururka Jaamacada Carabta ayaa ku baaqay in la ixtiraamo madax-banaaniada iyo midnimada Soomaaliya.
