Ciidamada cirka ee dalka Ruushka ayaa weeraro culus oo dhinaca cirka ah ku qaaday dalka Ukraine , gaar ahaan magaalada caasimadda u ah ee Kyiv, waxaana weerarkan ka dhashay khasaaro badan oo isugu jira dhimasho iyo dhaawac.
Ruushka ayaana diyaarado nuuca aan duuliyaha laheyn oo lagu farsameeyay Iran iyo diyaarado kale ku weeraray magaalada Kyiv, waxa ayna diyaaradaha garaaceen goobo bartilmaameed u ahaa oo kuyaalla caasimadda Ukraine.
War kasoo baxay milatariga Ukraine ayaa lagu sheegay, in Ruushka uu Ukraine ku soo qaaday weerar dhanka cirka ah isagoo adeegsanaya 158 qaabood oo kala duwan oo ah weerarro dhanka hawada ah.
Inta la xaqiijiyay weerarkan dhinaca cirka ah ee Ruushka ku qaaday dalka Ukraine waxaa ku dhintay dad ka badan 16-qof, waxaa sidoo kale ku dhaawacmay dad kale oo badan oo qaarkood dhaawacyo culus qabaan.
Weerarkan dhinaca cirka ah ee Ruushka ku qaaday dalka Ukraine ayaa noqonaya mid kamid ah kuwii ugu cuslaa, waxa uuna weerarkan imaanayaan xilli ciidamada Ukraine dhawaan qarxiyeen markab dagaal oo Ruushka lahaa.
Xafiiska Shabakada Allbanaadir.com
Muqdisho Somalia
Allbanaadir@live.com
