Qarax iyo dab ka dhacay keydka shidaalka ee ugu weyn dalka Guinea ee caasimadda Conakry ayaa sababay dhimashada ugu yaraan 11 qof halka in ka badan 80 kalena ay ku dhaawacmeen sida ay sheegeen mas’uuliyiinta dalkaas xili dalkaas Galbeedka Afrika ku yaalla uu sugayay gargaar uu ka helo dalal kale, waxaana la filayaa in dhimashadu ay kororto.
Qaraxa weyn ayaa ka dhashay dabka ka kacay keydka shirkadda Petroleum ee dalka Guinea kadib saqdii dhexe ee xalay, sida ay sheegtay madaxtooyada Guinea. Waxaa uu burbur xooggan ka geystay bartamaha degmada Kaloom oo ay ku yaallaan inta badan xafiisyada dowladda.
Ugu yaraan 88 qof ayaa soo gaaray dhaawacyo halis ah, ayuu yiri Lt. Col. Jean Traoré, oo ah agaasimaha farsamada ee Adeegga Ilaalinta Rayidka ee Guinea. “Qiimeyntani waa mid ku meel gaar ah,” ayuu u sheegay suxufiyiinta.
Ilaa hadda si rasmi ah looma oga waxa sababay qaraxa ka dhacay bakhaarka shidaalka ugu badan ee dalka Guinea. Kaydka ayaa lagu waday in loo raro meel fog si looga fogaado musiibada noocan ah.
Waxaa hadda jirta cabsi laga qabo in saadka uu hakad galo maadaama waddanku ku tiirsan yahay batroolka sifaysan ee dibadda laga keeno.
Mid ka mid ah shaqaalaha goobtaas ayaa laga soo xigtay mareegta wararka ee Guinee Matin ee fadhigeedu yahay magaalada Conakry in uu qaraxu dhacay xilli uu markab degayay. “Waxa aan dabkan ku waayay dhawr saaxiibbaday. Qaar aniga oo kale ah waa waardiye, qaarna waa farsamayaqaanno. Dhammaan xafiisyadii waa burbureen sidoo kale dhammaan qalabkii,” ayuu yiri shaqaalaha oo magaciisa lagu sheegay Axmed Condé.
Wasiirka amniga Bachir Diallo ayaa telefishinka qaranka ka sheegay in la xakameeyey dabka, isla markaana dalal ay ka mid yihiin Senegal iyo Mali ay u soo direen kooxo caafimaad iyo kuwo badbaado.
Dabka ayaa qabsaday dhowr xafiis iyo dhismayaal. Dad badan oo deganaa guryahoodii ayaa ka qaxay ka dib markii uu qiiq aad u badan uu faafay.
Maamulka ayaa xiray iskuullada iyo goobaha dadweynaha ee caasimadda. Gelitaanka degmada waa la xiray marka laga reebo adeegyada muhiimka ah. Madaxtooyadu waxay dadka ka codsatay inay guryahooda joogaan.
Col. Mamadi Doumbouya, oo si ku meel gaar ah loogu dhaariyay xilka madaxtinimo ee dalka ka dib afgambigii dhicisoobay ee 2021-kii, ayaa sheegay in gobolka uu si buuxda u daryeelayo dadka dhaawacmay.
“Waxaan ugu baaqayaa dadka reer Guinea inay muujiyaan midnimo iyo u duceynta qaranka xilliyadan tijaabada adag,” ayuu Doumbouya intaa raaciyay.
