Cudurro ay ka mid yihiin busbuska, qoorgooyaha iyo caabuqyada neef-mareenka sare ayaa ku faafaya Gaza sida ay sheegeen mas’uuliyiinta caafimaadka Falastiin iyo kuwa caalamiga ah, iyadoo xaaladaha nololeed ay uga sii darayaan go’doominta iyo weerarka Israel ee socda.
Ku dhawaad 160,000 ilaa 165,000 oo xaaladood oo shuban ah ayaa laga diiwaan geliyey carruurta da’doodu ka yar tahay shan sano, sarkaal sare oo ka tirsan Ururka Caafimaadka Adduunka (WHO) ayaa u sheegay warbixin kooban Talaadadii, isagoo ku tilmaamay tiradaas in ka badan tan caadiga ah.
Kiisaska Meningitis, iyo cagaarshow ayaa sidoo kale laga diiwaan geliyay deegaanka, sida uu sheegay Richard Peeperkorn, wakiilka WHO ee dhulka Falastiiniyiinta ee la haysto. WHO ayaa isku dayaysa in ay shaybaarka guurguura ka samayso Gaza si ay u baarto muunada cagaarshowga.
Wuxuu ka digay in xaaladaha nololeed ee ciriiriga ah ay ka qeyb qaataan faafitaanka cudurrada.
In ka badan 130,000 oo xaaladood oo ah caabuqyada neef-mareenka iyo 35,000 oo xaaladood oo finan maqaarka ah ayaa la diiwaan geliyey sida ay sheegtay Wasaaradda Caafimaadka Falastiin.
Ugu yaraan 4,395 xaaladood oo busbus ah ayaa sidoo la diiwaan geliyey, sida lagu sheegay warbixinta.
Faafidda cudurrada ayaa waxaa sii kordhiyey cadaadisyo dheeraad ah oo ku yimid nidaamka caafimaadka ee Gaza Kaliya 11 ka mid ah 36-da cisbitaal ee deegaanka ayaa xitaa qayb ahaan shaqeeya.
