Guddoomiyaha Gobolka Banaadir Ahna Duqa Magaalada Muqdisho Mudane Yuusuf Xuseen Jimcaale (Madaale) oo ay wehliyaan Wasiiro, Xildhibaano, Guddoomiye Kuxigeenada Gobolka Banaadir iyo Xoghayaha Guud ayaa xariga ka jaray Dhismaha Xarunta Maamulka Degmada Kaaraan oo dib-u-dhis balaaran lagu sameeyay.
Munaasabadda xarig jarka ayaa waxaa ugu horeyn ka hadlay Guddoomiyaha Degmada Kaaraan Mudane Abshir Maxamed (Abshir Kaaraan) iyo Agaasimaha Guud ee waaxda Qorsheynta iyo Maalgeshiga Gobolka Banaadir Mudane Cabdulqaadir Muxiyadiin (Dalxa) oo labaduba sharaxaad ka bixiyay marxalidihii kala duwanaa oo ay soo martay dib-u-dhiska Degmada iyo in xilligaan loo diyaariyay dhamaan xafiisyada lagu qaban lahaa adeegyada kala gedisan oo ay Bulshada u baahan yihiin.
Guddoomiyaha Gobolka Banaadir Ahna Duqa Magaalada Muqdisho Mudane Yuusuf Xuseen Jimcaale (Madaale) ayaa sheegay in Maamulka Gobolka ay ka go’an tahay horumarinta Kaabayasha Adeega Bulshada oo ay ugu horeeyaan dhismaha Wadooyinka iyo Xarumaha loogu adeego Bulshada, isla markaana Degmooyinka Gobolka Banaadir lagu tartan siin doonno dib-u-dhiska iyo adeegyada ay u hayaan shacabka Gobolka Banaadir.
