Daawo Sawirada: Gudoomiyaha Cusub ee Dayniile oo maanta si qurux badan xilka ula wareegay

Waxaa maanta munaasabad qurux badan oo lagu qabtay xarunta degmada Dayniile ee gobolka Banaadir xilka kula wareegay Gudoomiyaha cusub ee Degmada Dayniile Maxamed Abuukar Cali Jacfar.

Munaasabada xil wareejinta waxaa kasoo qeyb galay Xildhibaano katirsan Baarlamaanka Federaalka Soomaaliya, Gudoomiyaha gobolka Banaadir iyo labo kamid ah kuxigeenadiisa, Gudoomiyaal degmo , Saraakiil ciidan iyo qeybaha kala duwan ee bulshada Dayniile.

Waxaa hadalo u badan soo dhaweyn munaasabada ka jeediyay qaar kamid ah waxgaradka degmada Dayniile kuwaa oo muujiyay sida ay ugu faraxsan yihiin in Jacfar loo doorto Gudoomiyaha Dayniile, waxa ayna balan qaadeen in la shaqeyn doonaan.

Gudoomiyihii hore ee Degmada Dayniile Cabdi Wali Nuur Faarax oo xilka wareejinayay ayaa sheegay in uu wax badan soo qabtay inta uu xilka hayay, waxa uuna balan qaaday in uu la shaqeyn doono Gudoomiyaha cusub ee Dayniile Jacfar.

Maxamed Abuukar Cali Jacfar Gudoomiyaha Cusub ee Dayniile oo isna Munaasabada ka hadlay ayaa sheegay in uu la imaan doono waxqabad muuqda inta karaankiisa ah, waxa uuna ka codsaday bulshada kunool Dayniile in ay la shaqeeyaan si ay uwada guuleestaan.

Waxaa sidoo kale Munaasabada ka hadlay Xildhibaan Mustafa Dhuxulow iyo Xildhibaan Cabdirashiid Maxamed Xidig, waxa ayna sheegeen in Xildhibaan ahaan la shaqeyn doonaan Bulshada Dayniile iyo Gudoomiyahooda.

Ugu Dambeyn Munaasabada xil wareejinta waxaa soo xiray Gudoomiyaha gobolka Banaadir Eng Cabdirxamaan Yariisow, waxa uuna Gudoomiyaha sheegay in Jacfar kusoo xusheen in uu yahay nin wax qabad badan kana filayaan in uu wax badan ka qabto Degmada Dayniile.

Yariisow ayaa balan qaaday in maamulkiisa si buuxda ula shaqeyn doono maamulka cusub ee degmada Dayniile, waxa uuna bulshada Dayniile ka codsaday in maamulka kala shaqeeyaan amaanka .

Munaasabasda xil wareejhinta ayaa si heer sare ah kusoo dhamaatay, waxaana dhamaan dadkii kala duwanaa ee munaasabada ka hadlay si weyn usoo dhaweeyeen Gudoomiyaha cusub ee degmada Dayniile Maxamed Abuukar Cali Jacfar.