Hay’adda Caafimaadka Adduunka ee WHO ayaa cambaareysay weerarkii lagu qaaday isbitaalka Indonesia ee Gaza oo ay ku dhinteen 12 qof oo ay ku jiraan bukaanno.
Ciidamada Israel ayaa qirtay iney gantaal ku dhufteen Isbitaalka ka dib markii ay ku andacoodeen in rasaas looga riday gudaha Isbitaalka, hase ahatee Xamaas iyo maamulka Isbitaalka ayaa arrintaas beeniyey
Qoraal uu soo dhigay bartiisa X, Agaasimaha Guud ee WHO Tedros Adhanom Ghebreyesus wuxuu yiri, “WHO waxay ka naxsan tahay weerar lagu qaaday Isbitaalka Indonesia ee Gaza.”
“Shaqaalaha caafimaadka iyo dadka rayidka ah waa inaaney waligood la kulmin argagaxa noocaan ah, gaar ahaan marka ay gudaha isbitaalka ku jiraan,” ayuu raaciyay.
Dadka dhintay waxaa ka mid ah bukaano lagu daweynayo isbitaalka iyo xubin ka tirsan shaqaalaha caafimaadka, sida ay sheegeen saraakiisha caafimaadka.
Israel ayaa cambaareyn caalami ah kala kulantay weerarada ay ku heyso Isbitaalada magaalada Gaza oo loo arko dambi dagaal oo ka dhan ah bani aadamnimada.
