Ra'isul Wasaare Xamse oo Indhihiisa kusoo arkay dhibaatada ka taagan Doolow (Sawirro)

Ra’iisul Wasaaraha Soomaaliya Mudane Xamsa Cabdi Barre, ayaa kormeer uu ugu kuur galayo xaaladda binu aadantinimo ee ka dhalatay roobabka daadadka wata ee ka da’ay qeybo kamid ah gobollada dalka, waxa uu ku tagey degmada Doolow ee gobolka Gedo.

Wafdiga Ra’iisul Wasaaraha ayaa waxaa garoonka diyaaradaha ee degmada Doolow ku soo dhaweeyey Madaxweyne ku-xigeenka koowaad ee dowlad Goboleedka Jubbaland, Mudane Maxamuud Sayid Aadan, masuuliyiin ka tirsan dowlad-goboleedka iyo qeybaha kala duwan ee bulshada ku dhaqan Doolow.

Ra’isul Wasaare Xamse Barre ayaa kulamo kala duwan la qaadan doona maamulka Jubbaland iyo qeybaha kala duwan ee bulshada ku dhaqan degmada Doolow , si uu uga wareesto waxyeelada ka dhalatay fatahaada roobku sababay.

Xamse Barre ayaa sidoo kale indhihiisa kusoo arkay waxyeelada ka dhalatay roobkii daadadka watay iyo fatahaada wabiga sameeyay, waxa uuna sheegay in dowladda intii karaankeeda ah wax u qaban doonto dadka fatahaada saameynta ku yeelatay.