Hogaamiyaha Mucaaradka Israel Yair Lapid ayaa ugu baaqay Ra’iisul Wasaare Benjamin Netanyahu inuu iscasilo, isagoo sheegay in hogaamiyaha Israel uu lumiyay kalsoonida shacabka.
Waa markii ugu horeysay ee Lapid uu ku booriyo Netanyahu inuu shaqada ka tago tan iyo markii Xamaas ay weerartay Israa’iil 7-dii Oktoobar.
“Netanyahu ma sii ahaan karo ra’iisul wasaaraha Israel. Waxaan u baahanahay dowlad soo kabasho qaran, wuxuu u baahan yahay inuu hadda tago. Ma ogolaan karno inaan helno Ra’iisul Wasaare lumiyay kalsoonida shacabka, haddii ay ahaan lahayd dhinaca bulshada ama dhanka amniga,” ayuu yiri Lapid oo wareysi siiyay Channel 12 ee Israel.
“Dadka sida saxda ah wax u wadaa waa xarumaha difaaca. Xukuumaddani waa mid aan shaqaynayn,” ayuu yiri, “Waxaan u baahanahay inaan bedelno dawladda” ayuu intaas ku daray
Si kastaba ha ahaatee, ra’iisul wasaarihii hore ayaa intaas ku daray inuusan u maleyneynin in hadda la joogo waqtigii ku habboonaa ee lagu qaban lahaa doorasho.
Taas beddelkeeda, waxa uu sheegay in tallaabada ugu wanagsan ay ahayd in xisbiga Netanyahu ee Likud uu xilka ka tuuro hoggaamiyaha rug-caddaaga ah oo uu ku beddelo saaxiibkiis.
Waxaa si weyn hoos ugu dhacday taageerada ay shacabka Yuhuuda u hayaan Raisul wasaare Netanyahu tan iyo markii Xamaas ay weerartay gudaha Israel 7dii bishii ina dhaaftay ee Oktoobar halkaasoo ay ku laayeen dad ka badan 1400 oo qof, isla markaana qafaasheen tiro kor u dhaaftay 200.
