Dagaal xooggan iyo duqeymo culus ayaa xalay ilaa maanta ka socda deegaanno katirsan magaalada Gaza, waxa ayna ciidamada Isreal isku dayayaan in ay si buuxda gudaha ugu galaan magaalada go’doonsan ee Gaza.
Ciidamada Isreal ayaa xalay magaalada Gaza ku garaacay mid kamid ah duqeymihii ugu cuslaa, waxa ay sidoo kale ciidamada oo wata taangiyo isku dayeen in ay galaan qeybo kamid ah magaalada Gaza.
War kasoo baxay garabka milatariga Xamaas ee Al Qassam ayaa sheegay inay xalay dagaal fool ka fool ah la galeen ciidamada dhulka ee Israa’iil, dagaalkan ayaana ka dhacay laba goobood oo ku yaalla Gaza.
Xamaas ayaa sheegtay in dagaalka xoogiisu ka dhacay meel u dhaw Beit Hanoun , waxaana la sheegay in ciidamada Israel weeraro kadis ah kala kulmeen dagaalyahanno aad u hubeysan oo Xamaas katirsan.
Warka kasoo baxay kooxda Xamaas ayaa sidoo kale lagu sheegay in dagaalkii xalay u adeegsadeen hubka taangiyada lagula dagaallamo, waxa ayna intaa ku dareen in ciidamada Isreal gaarsiiyeen khasaaro isugu jira dhimasho iyo dhaawac.
Milatariga Isreal ayaa dhankooda war ay soo saareen ku sheegay in weerarkii xalay ku bartilmaameedsadeen 150-goobood ay joogeen kooxda Xamaas, waxa ayna Isreal guulo ka sheegteen weerarkii xalay ku qaadeen magaalada Gaza.
Xafiiska Shabakada Allbanaadir.com
Muqdisho Somalia
Allbanaadir@live.com
