Qarax ismiidaamin ah ayaa goor dhow oo fiidnimadii ah ka dhacay Maqaayadda Blue Sky oo kaabiga ku heysa taallada Xaawa Taako.
Goobta uu qaraxan ka dhacay ayaa dhowr boqol oo talaabo u jirta xarunta Madaxtooyada Villa Somalia ee magaalada Muqdisho.
Wararka ayaa sheegaya in qof waxyaabaha qarxa soo xirtay uu isku qarxiyey dad fadhiyey banaanka maqaayadaas oo halkaas isaga fiidsanayey.
Maqaayaddaan waxay u dhexaysaa laba Bar koontarool ee ciidanka madaxtooyada oo kala ah midka Godka Jilacow iyo Xaawa Taako waana meel aammaankeeda aad u adag yahay inkastoo dadka lugta ku socda aan la baarin.
Ciidamada madaxtooyada ayaa xiray dhammaan aaggaas ayagoo diiday in warbaahinta iyo dadka kale tagaan goobta, welina ma cadda khasaaraha rasmiga ah ee ka dhashay qaraxan, Inkastoo ay jiraan warar sheegaya iney jiraan dhimasho iyo dhaawac.
Waa markii 3aad ee qaraxyo lala beegsado Maqaayada Blue sky sanadihii la soo dhaafay, iyadoo qaraxyadii hore ay ku naf waayeen dad badan oo fadhiyey maqaayadaas, halka qaar kalena ku dhaawacmeen.
