Ciidanka maamulka Galmudug iyo kuwa dadka deegaanka ee ku sugan deegaanno hoostaga degmada Baxdo ee gobolka Galgaduud, ayaa gacanta ku dhigay gaadiid la sheegay in raashin iyo sahay kale u wadeen Al Shabaab.
Gaadiidkan oo ahaa afar gaari oo nuuca Homeyda Soomaalidu u taqaan ayaa la qabtay iyaga oo maraya dhul qardo jeex ah, waxaana gaadiidkan ku rarnaa raashinka nuucyadiisa kala duwan, shidaal iyo agabyo kale.
Saraakiisha ciidamada gaadiidkan gacanta ku dhigay oo warbaahinta la hadlay ayaa sheegay in ay heleen xogta gaadiidka Al Shabaab u waday raashinka iyo sahadyad kale, waxa ayna xuseen in ciidamada ku guuleesteen in gaadiidkaasi soo qabtaan.
Waxa ay saraakiisha digniin adag u direen dadka kale ee damacsan in raashin iyo alaabo kale u geeyaan Al Shabaab, waxa ayna cadeeyeen cid kasta oo la qabta iyaga oo cadawgooda wax u sida tallaabo adag ka qaadi doonaan.
Gaadiidka la qabtay ee kusii jeeday deegaannada Al Shabaab maamulaan ayaa loo waday degmada Baxdo ee gobolka Galgaduud, halkaas ay sheegeen saraakiisha booliiska Galmudug in baaritaanno lagula sameyn doono gaadiidka iyo dadkii la socday.
Xafiiska Shabakada Allbanaadir.com
Muqdisho Somalia
Allbanaadir@live.com
