Waaxda arrimaha dibadda ee Mareykanka ayaa Isniintii sheegtay in ugu yaraan sagaal muwaadin oo Mareykan ah lagu dilay weerarrada ay Xamaas ku qaaday Israa’iil dhamaadkii todobaadka.
Wasaaradda arrimaha dibadda Mareykanka ayaa sheegtay in tiro aan la cayimin oo muwaadiniin Mareykan ah ay weli maqan yihiin oo aan la ogeyn halka ay ku sugan yihiin. Ma cadda in dadka la la’yahay la qafaashay, in la dilay iyo in ay dhuumaalaysi ku jiraan.
Waaxda Arrimaha Dibadda waxay la xiriirtay qoysaska si ay u bixiso dhammaan kaalmada qunsuliyada ee ku habboon,” ayuu yiri afhayeen u hadlay Matthew Miller.
Dhinaca kale, Israa’iil ayaa duqeymo ba’an ka geysatay bartamaha xerada qaxootiga ee Jabalia, oo ku taal waqooyiga marinka Qaza, agagaarka suuq caan ah oo dadku ku badan yihiin, waxaana ka dhashay tobanaan dhimasho iyo dhaawac ah ilaa hadda.
Arrintan ayaa ku soo beegantay xilli wasiirka difaaca Israa’iil Yoav Galant uu ku dhawaaqay inuu amar ku bixiyay in gebi ahaanba la go’doomiyo marinka Qaza, isla markaana la gooyo sahayda korontada, cuntada iyo shidaalka, wax kastana la xiro.
