Dowladda Mareykanka ayaa digniin adag u dirtay duuliyaasha diyaaradaha ee adeegsanaya hawada dhulka ay maamusho Israa’iil, xilli dagaal iyo duqeymo u dhaxeeya ciidamada Israa’iil iyo xoogaga xaq u dirirka Xamaas uu socdo.
War kasoo baxay hay’adda Duulista Rayidka Maraykanka ayaa ugu baaqday shirkaddaha duulimaadka Maraykanka iyo duuliyayaashooduba in ay taxadar dheeraad sameeyaan marka ay marayaan hawada Israa’iil.
Hay’adda duulimaadka rayidka ee federaalka Mareykanka ayaa sheegtay in si dhab ah loo qaato digniinnaha soo baxaya, waxa ayna duuliyaasha kula talisay in ay ka fogaadaan meelaha halista badan ay ka jirto.
Dhinaca kale waaxda arrimaha dibadda dowladda Mareykanka ayaa digniin u dirtay muwaadiniinta Mareykanka ee jooga dhulka Israa’iil, waxa ayna dadkaasi kula talisay in ay sameeyaan taxadar dheeraad ah.
Dowlado badan oo caalamka una badan waddamada reer Galbeedka ayaa ka walaacsan xaalada muwaadiniintooda jooga dhulka Israa’iil maamudho, waxa ayna u direen digniino la xiriira in ay taxadar galaan ama kasoo tagaan dalkaasi.
