Madaxweynaha Kenya William Ruto ayaa u safri doona dalka Shiinaha dabayaaqada bishan si uu u raadiyo lacag dhan $1bilyan oo doolar oo amaah ah si uu ugu bixiyo mashaariicda waddooyinka ee istaagay, ku xigeenkiisa Rigathi Gachagua ayaa sidaas sheegay.
Gachagua ayaa u sheegay idaacada Inooro FM ee ku hadasha afka maxaliga ah in qandaraasleyaal badan ay ka tageen mashaariic dalka ka socday maadaama aysan helin qarashaadkii ay ku shaqayn lahaayeen.
Waxa uu sheegay in iyadoo Kenya uu shiinuhu ku leeyahay deymo badan, hadana madaxweynaha uu weydiisan doono $1bn oo dheeri ah isagoo doonaya in muddo dheer lagu bixiyo lacagtii hore loogu lahaa.
Waxa uu sheegay in madaxwaynuhu uu Shiinaha u sheegi doono “waan ognahay in aad lacag nagu leedihiin, ma wada hadli karnaa si aad wakhtiga noogu kordhisaan, si tartiib-tartiib ah ayaanu u bixinaynaa, oo mana noogu dari kartaan deyn dheeraad ah oo aan waddooyinka ku dhameys tirno?”.
Shiinuhu waxa ay Kenya ku leeyahay in ka badan $8bn oo deymo ah oo inta badan lagu heshiiyey dowladdii hore ee uu madaxweynaha ka ahaa Uhuru Kenyatta oo loogu talagalay mashaariicda kaabayaasha dhaqaalaha.
Madaxweyne ku xigeenka ayaa ka hadlay qarashaadka xad-dhaafka ah ee madaxda dowladda, isagoo sheegay inay tahay sababta uu madaxweynuhu u amray in la hakiyo safarrada dibadda.
Horaantii todobaadkan ayay ahayd markii madaxtooyadu ka mamnuucday safarada aan muhiimka ahayn ee ay dalka dibadiisa ugu baxayaan masuuliyiintu si ay kharashaadka u dhimaan, waxaana ay ku amartay dhamaan wasaaradaha in ay dhimaan miisaaniyada sanadka soo socda 10%.
Dowladda ayaa lagu eedeeyay kharashaad aan loo baahnayn iyadoo dad badan oo Kenyaan ah ay ka cabanayaan sare u kaca maciishada iyo canshuur kordhinta ay dowladdu samaysay.
