Ciidamada Xoogga dalka, daraawiishta Galmudug iyo kuwa Difaaca Shacabka ee Koofurta gobolka Mudug ku sugan ayaa dagaal culus oo dhowr jaho ah ku qaaday saaka dhulka howdka ah ee degaanka Shabeellow iyo godad la sheegay iney difaacyo ka sameysteen Al-shabaab.
War ka soo baxay taliska ciidamada xoogga dalka ayaa lagu sheegay in howlgalkaas khasaare xoogleh lagu gaarsiiyey Al-shabaab
“Ciidamada huwanta ah oo la socday dhaqdhaqaaqa Khawaarijta ayaa helay xogta goob ay isku aruursaneysay kooxdu oo ay dooneysay inay ka soo abaabusho dagaal iyo qaraxyo waxaana ay iyaga oo xogtaas ka duulaya ay galabta dagaal dhowr jaho ah ku qaadeen goobtii halkaasoo khasaare xoogleh lagu gaarsiiyey cadowga’ ayaa lagiu yiri qoraal ka soo baxay ciidanka xoogga dalka.
Ciidamada ayaa intaas ku daray in Dagaalkii saaka Al-shabaab looga saaray godadkii ay gabbaadka ka dhiganaysay ee deegaankaas.
“Mar kale ayaa ciidanku galabta weerar ku qaaday habqankooda, saraakiisha ciidanka hoggaamineysa ayaana Warbaahinta Qaranka u sheegay in cadowga cashar lama iloobaan ah loogu dhigay howdka Shabeellow” ayaa lagu yiri qoraalka ka soo baxay ciidamada.
