Xaalada degmada Maxaas ee gobolka Hiiraan ayaa saakay degan, kaddib dagaal xooggan oo shalay galab degmadaasi ku dhax maray ciidamo katirsan xoogga dalka iyo ciidamada deegaanka Macawuusleyda beesha Xawaadle.
Dagaalka ayaa waxaa ka dhashay khasaaro badan oo isugu jira dhimasho iyo dhaawac, waxaana xaalada degmada shalay galab noqotay mid kacsan oo inta badan dadka wadnaha farta kuwada hayeen.
Sida aan wararka ku heleyno waxaa saakay degmada Maxaas ka socda dedaalo nabadeed ay wadaan siyaasiyiin , xildhibaanno , saraakiil iyo odayaasha dhaqanka, dedaaladan ayaana lagu doonayaa in xal looga gaaro shaqaaqadii shala dhacday.
Guddoomiyihii hore ee gobolka Hiiraan Cali Jeyte Cusmaan iyo Xildhibaan Maxamed Abuukar Cali Jacfar ayaa wararku sheegayaan in ay hormuud u yihiin dedaalada socda, waxa ayna labada masuul ku guuleesteen in ciidanka lakala qaado.
Ciidanka xoogga dalka ayaana lagu amray in xeryaha lagu ogyahay aysan kasoo bixin, waxaana saakay xaalada degmada ay tahay mid degan , waxaana la filayaa in saacadaha soo aadan xal rasmi ah laga gaaro waxii dhacay.
Degmada Maxaas waxaa fariisin u tahay ciidamo katirsan xoogga dalka iyo ciidamo deegaanka oo kasoo jeeda beesha Murusade, waxaa sidoo kale degmadaasi horey u joogay ciidanka deegaanka beesha Xawaadle .
