Kooxo hubeysan oo ka tirsan Al-Shabaab ayaa la soo sheegayaa iney dhaqdhaqaaqyo ciidan ka bilaabeen degaano hoos taga gobolka Gedo ee Koonfurta Somalia.
Wararka ayaa sheegaya in Al-shabaab ay jidgooyo dhigteen wadada u dhaxeysa degmooyinka Luuq iyo Doolow, halkaasoo ay gaadiidka uga qaadayaan lacago lagu sheegay canshuur.
Ciidanka Al-Shabaab waxa la sheegay in ay bar koontarool ka sameysteen deegaanka la yiraahdo Geedweyne, halkaasoo ay maraan dadka shacabka ah ee doonaya inay isaga kala gudbaan labada magaalo.
Gudoomiye Ku-xigeenka Gobolka Gedo Cismaan Nuur Xaaji (Macalimu) ayaa sheegay in ay bilaabayaan qorshe Al-Shabaab looga nadiifinayo wadada u dhaxeysa Doolow iyo Luuq, guud ahaana looga saarayo gobolka.
Waxaa uu intaas ku daray in maamulkiisu u dulqaadan doonin kooxaha ka tirsan Al-shabaab ee jidgooyada dhigtay, wuxuuna ku hanjabay iney saacadaha soo socda ka howlgeli doonaan.
