Madaxweynaha Dowladda Hirshabeelle Mudane Cali Guudlaawe Xuseen oo wada abaabul ka dhan ah Al-Shabaab ayaa maanta booqasho iyo kormeer dhiirigelin ah ugu tagay Ciidanka Xooga Dalka iyo kuwa dib u xoreynta deegaanka ee ku sugan deegaanada Ciid-ciidka iyo Cali Fooldheere ee Gobolka Shabeellaha Dhexe.
Madaxweynaha oo ay wehliyeen Wasiiro, Xildhibaano, Gudoomiyaha Gobolka Shabeellaha Dhexe, Saraakiil iyo Masuuliyiin kale ayaa deegaanka Cali Fooldheere kula hadlay boqolaal Ciidanka Xoogga Dalka iyo Kuwa dib u xoreynta deegaanka, isagoo ku bogaadiyay guulaha ay ka gaareen dagaalka ay kula jiraan Al-Shabaab, waxa uuna ku dhiirigeliyay ciidanka inay sii wadaan halgankooda naf-hurnimo loogana baahan yahay inay soo afjaraan Al-Shabaabka  ku go’doonsan Dhulka howdka ah ee Ciid-ciidka iyo Jembilow.
Madaxweynaha ayaa adkeeyay in lasii dardargelin doono baacsiga Al-Shabaab Dowladuna ay ka go’an tahay ciribtirka cadowga, isagoo intaas raaciyay in adeegga muhiimka ah ee dowladda la gaarsiin doono deegaanada iyo degmooyinka laga xoreeyay alshabaab.
