Guddoomiyaha gobolka Banaadir ahna duqa magaalada Muqdisho Mudane Yuusuf Xuseen Jimcaale (Madaale) ayaa boqolaal dadweyne ah iyo ciidamada difaaca shacabka kula hadlay deegaanka Nuur-Dugle ee gobolka Shabeelaha Dhexe.
Duqa Muqdisho oo Sh/Dhexe u jooga dar-dargelinta Howlgallada sifeynta Al Shabaab, ayaa shacabka Nuur-Dugle iyo ciidamada difaaca ku amaanay sida ay u garab istaageen ciidamada Qaranka iyo doorka ay ka qaateen in ay iska dulqaadaan kooxaha Al Shabaab.
“Waxaa la idin ka rabaa in deegaanada laga sifeeyay Khawaarijta aysan dib danbe ugu soo laaban oo la difaaco, sidoo kale waxaa la idin ka rabaa in ciidamada Qaranka iyo shacabka kale lagu garab siiyo sidii haraadiga khawaarijta loogu sifeyn lahaa deegaanada ay kaga harsan yihiin Gobolka iyo guud ahaan dalka” ayuu yiri guddoomiye Madaale
Guddoomiyaha gobolka Banaadir Yuusuf Madaale ayaa xusay in deegaanada laga sifeeyay Al Shabaab sida ugu dhaqsiyaha badan loosoo gaarsiin doonno adeegyadda aasaasiga, si bulshada ay u helaan caafimaad, Waxbarasho iyo adeegyada kale ee Muhiimka ah.
