Wiil uu dhalay ninka caanka ah ee daroogada Joaquín “El Chapo” Guzmán ayaa loo gacan galiyay Mareykanka kadib markii lagu eedeeyay ka ganacsiga daroogada, sida uu sheegay xeer ilaaliyaha guud ee Mareykanka.
Ovidio Guzmán ayaa looga shakisan yahay inuu hogaaminayay, isaga iyo walaalkiis, kooxda awoodda leh ee daroogada Sinaloa ee aabihiis aasaasay.
Ovidio ayaa sidoo kale lagu eedeeyay inuu amray dilka fanaan diiday inuu bandhig faneed ka sameeyo arooskiisa.
Waxaa bishii Janaayo lagu xiray gobolka Sinaloa ee waqooyiga Mexico, waxaana uu xabsiga ku jiray tan iyo xilligaas.
“Tallaabadan waa tillaabadii ugu dambeysay ee dadaalka Waaxda Caddaaladda ee lagu weerarayo dhinac kasta oo ka mid ah hawlgallada kooxdan,” ayuu Xeer-ilaaliyaha Guud ee Mareykanka Merrick Garland ku yiri hadal uu soo saaray oo la xiriira dhiibista.
“Dagaalka ka dhanka ah cartels-ku wuxuu ku lug lahaa geesinimo cajiib ah oo ay sameeyeen sharci fulinta Mareykanka iyo sharci fulinta Mexico iyo xubnaha ciidamada, kuwaas oo intooda badan naftooda u huray raadinta caddaaladda.”
Ma jirin wax falcelin ah oo degdeg ah oo ku saabsan dhiibista maamulka Mexico.
Waxay ku soo beegantay maalmo ka dib markii xaaska aabihiis, Emma Coronel, laga sii daayay xabsiga Mareykanka ka dib markii lagu xukumay bishii Nofembar 2021 eedeymo ka ganacsiga daroogada.
Ninkeeda waxa uu xabsi daa’im ku qaadanayaa xabsiga supermax ee Colorado kadib markii uu hogaamiyay kooxda Sinaloa.
Ovidio Guzmán waa mid ka mid ah afar carruur ah oo El Chapo ay u dhashay Griselda López sannadihii 1980-meeyadii iyo 90-meeyadii. Midka ugu da’da weyn, Edgar, ayaa lagu dilay israsaasayn ka dhacday 2008dii.
El Chapo waxa kale oo uu leeyahay caruur kale oo ka soo jeeda guurkiisii hore iyo xidhiidhkii uu la lahaa Coronel.
Guzmán, oo sidoo kale loo yaqaan “El Ratón” (Mouse), ayaa lagu xiray meel ka baxsan magaalada Culiacán ka dib howlgal ilaalin ah oo socday lix bilood.
29 qof ayaa ku dhintay israsaaseyn dhex martay ilaaladiisa iyo ciidamada amaanka iyadoo toban kamid ah dadka dhintey ay ahaayeen Boolis, waxaana xubno ka tirsan kooxdiisii ay gubeen basas iyo baabuur si ay u xiraan waddooyinka soo gala si ay uga hortagaan in booliisku ay soo gaaraan magaalada.
Ovidio ayaa diyaarad helicopter ah loogu qaaday magaalada Mexico iyadoo ka baqaya in hadii wadada lagu qaado ay kooxdiisu isku dayaan inay weeraraan kolonyada.
Bishii Juun 2020, ciidamada ammaanku si kooban ayay u xireen, laakiin waxaa amar ku bixiyay madaxweynaha Mexico Andrés Manuel López Obrador inay sii daayaan si aysan dadka khatar gelin iyadoo dableyda Sinaloa ay gubeen basaska ayna dagaal ku qaadeen bilays iyo askar.
Sinaloa cartel waa urur dambiilayaal heer caalami ah oo ay ku qiyaaseen saraakiisha fulinta sharciga ee Maraykanku inay soo galiyeen Maraykanka in ka badan 1,000 tan oo ah cocaine, marijuana, methamphetamines iyo heroin.
Kooxda burcadda ah ayaa afduubay, jirdilay oo dilay xubno ka tirsan kooxaha iska soo horjeeda si ay u xoojiyaan awoodooda.
Xubnaha ayaa sidoo kale laaluushay saraakiisha booliiska iyo siyaasiyiinta sarsare ee Meksiko iyo guud ahaan Ameerikada dhexe si ay indhaha uga qarsadaan shixnadaha daroogada ama xitaa ay u sheegaan kooxihii ka dambeeyay weerarrada.
