Bariga dalka Liibiya waxaa ku dhuftay duufaanta Daniel, taa oo sababtay khasaaro badan oo isugu jira dhimasho, dhaawac iyo bur bur dhismayaal, waxaana sii kordhaya khasaaraha uu reebay duufaantan.
Afhayeenka wasaaradda Arrimaha Gudaha ee dalka Libya, Tariq Al-Kharaz, ayaa sheegay dhibaato xooggan ka dhalatay duufaanta ku dhufutay dalkaasi, waxa uuna xusay in ay socdaan gurmadka loo sameenayo dadka waxyeeladu gaartay.
Waxa uu sheegay afhayeenka in magaallada Derna oo keliya ay ku dhinteen 5,200 oo qof, halka 1,300 oo dheeraad ka ah tiradaasi ay aasteen qoysaskooda markii ay maydadkaasi aqoonsadeen.
Duufaanta Daniel ayaa Axadii la soo dhaafay ku habsatay Bariga dalka Libya, waxa ayna duufaantan noqotay musiibo ku habsatay dadka Liibiya , gaar ahaan magaalooyinka ay ku dhufatay ay ugu horeeyaan Derna, Benghazi, Al-Bayda, Al-Marj iyo Sousse.
