Waxaa goordhaw garoonka diyaaradaha Aadan Cadde ee magaalada Muqdisho laga qaaday ciidamo badan oo kasoo jeeda beesha Murusade, gaar ahaan jufada Habar Idinle ee degta degmada Galhareeri ee gobolka Galgaduud.
Ciidankan ka baxay Muqdisho ayaa loo qaaday degmada Guriceel ee gobolka Galgaduud, waxa ayna ciidankan ku biirayaan ciidamo kale oo horey ugu sugnaa degmadaasi loona diyaariyay in howlgalka ka qeyb qaataan.
Xildhibaan Xuseen Qaasim Iidow oo katirsan golaha Shacabka ee Baarlamaanka federaalka ayaa ciidankan goordhaw baxay hoggaaminaya, waxaana ciidankan garoonka kasii sagootiyay Senator Dhagdheer iyo masuuliyiin kale.
Ciidamada dadka deegaanka ee kasoo jeeda beesha Murusade ayaa ku kala sugan degmooyinka Maxaas iyo Guriceel, waxa ayna ciidankan dowladda ku wehlinayaan howlgalo lagu xureynayo degmooyinka Galhareeri, Ceelbuur iyo deegaannada hoostaga.
