Dagaallamayaal katirsan kooxda Al Shabaab ayaa xalay weerar loo adeegsaday madaafiic ku qaaday deegaanka Ceel-lahelay ee kuyaalla duleedka Dhuusomareeb, halkaas oo dhawwaan ciidanka dowladda iyo kuwa deegaanka la wareegeen.
Tiro madaafiic ah ayaa la sheegay in Al Shabaab kusoo tuureen deegaanka Ceel-lahelay, gaar ahaan farriisimaha ciidanka dowladda iyo kuwa deegaanka, ciidanka huwanta ah ayaana dhankooda madaafiic iyo hub kale oo culus u riday dhinaca Al Shabaab.
Saraakiisha ciidanka dowladda ee ku sugan deegaanka Ceel-lahelay ayaa sheegay in madaafiicda aysan ka dhalan wax khasaaro ah, waxa ayna sheegeen saraakiisha in madaafiicda ku dhaceen dhul bannaan.
Deegaanka Ceel-lahelay ee u dhaxeeya Dhuusomareeb iyo Ceelbuur ayaa dhawwaan waxaa la wareegay ciidanka dowladda iyo kuwa deegaanka, waxaana deegaankan shalay booqday madaxweynaha Galmudug, wasiirka Gaashaandhigga iyo taliyaha hayádda NISA.
