Waxaa sii kordhaya khasaaraha dhimasho iyo midka dhaawac ee ka dhashay dhul-gariir xalay ku dhuftay dalka Morocco, waxaana wali socda gurmadyo loo sameenayo dadka waxyeelada xooggan kasoo gaartay dhul-gariirka.
Tirada dadka ku dhintay dhul-gariirka ayaa hadda gaartay 820-qof, halka ay ku dhaawacmeen dad ka badan 600-qof oo kale, waxaana wali laga cabsi qabaa in khasaaraha inta hadda la ogyahay kasii bataan.
Dhul-gariirka ka dhacay dalka Morocco oo cabirkiisu ahaa 7.2 ayaa xalay ku dhuftay buuraha Atlas ee dalka Morocco, waxaana khasaaraha ugu xooggan uu gaaray dadka kunool dhulka buuraleyda , waxaana adag in gurmad lala gaaro aagaasi.
Warbaahinta Morocco ayaa tabisay in dhul-gariirka waxyeelo u geystay dhismayaal ku yaalla magaalada Marrakech, oo ah tan ugu weyn ee ugu dhow halka uu sida daran ugu dhuftay, waxaana dadka ku nool ay xalay ku hoyden bannaanka guryahooda .
Dowladda Morocco ayaa ugu baaqday in dadka isdejiyaan una duceeyaan dhibanayaasha, waxa ayna dowladda sheegtay in ay socdaan gurmadyo lixaad leh oo lala gaarayo deegaannada dhibka ugu daran uu gaaray.
