Dowladda Soomaaliya ayaa shaacisay in saakay weerar qorsheysan lagu qaaday saldhig ay dagaalyahannada Al Shabaab ku lahaayeen deegaanka Dumaaye oo hoostaga degmada Xarardheere ee gobolka Mudug.
War kasoo baxay dowladda ayaa lagu sheegay in howlgal qorshaysan oo ay iska kaashadeen ciidanka Qaranka iyo saaxiibada caalamiga ah ka dhacay deegaanka Dumaaye oo hoostaga degmada Xarardheere .
Weerarka ayey dowladda sheegtay in lagu qaaday saldhig ay lahaayeen Al Shabaab , halkaas oo la sheegay xilliga uu weerarka dhacayay in Al Shabaab saraakiishooda aagaasi joogtay ay shir ku lahaayeen.
Dowladda ayaa war kooban ay soo saartay ku sheegtay in weerarka lagu dilay inta badan xubnihii Al Shabaab ee ku sugnaa goobta la weeraray, mana shaacin dowladda khasaaraha rasmiga ah ee weerarkan ka dhashay.
