Ciidamada booliiska dalka Hindiya ayaa xiray baaritaana ku bilaabay macalimad ammartay in in ardayda ay dharbaaxaan arday muslim ah oo fasalka wax ka dhigta, waxaana falkan carro badan ka abuuray baraha bulshada.
Muuqaal lasoo galiyay baraha internetka ayaa laga dhax arkayaa macalimad dhigta dugsi hoose oo ardayda fasalka ku amreysa in ay si xooggan u dharbaaxaan wiil arday muslim ah oo kamid ah ardayda ay wax u dhigto.
Dhacdadan oo ka dhacday dugsi gaar loo leeyahay oo ku yaala gobolka woqooyi ee Uttar Pradesh ayaa abuurtay carro xooggan oo ka timid bulshada qeybaheeda kala duwan , gaar ahaan dadka muslimiinta ah ee kunool Hindiya.
Baraha bulshada muuqaalka lagu baahiyay ayaa laga dhax arkayaa wiilka yar oo ooyaya, markii la garaacayay, iyadoo sababta lagu sheegay in uu khalad sameeyay, waxaana muuqaalka laga maqlaa macalimada oo ardayda ku amreysa in xoog u dharbaaxaan wiilka.
Booliiska magaalada dhacdadan ka dhacday ayaa la sheegay in ay wadaan baaritaano ku aadan kiiskan cunsuriyadda xambaarsan, waxaana macalimadda haddii lagu helo kiiskan wajihi kartaa xarig iyo in shaqada laga eryo.
