20 xubnood oo ka tirsan al-shabaab ayaa lagu dilay howlgal qorshaysan oo ay si wadajir ah ciidamada dowladda iyo saaxiibada caalamiga ah uga fuliyeen deegaanka Cali Fuuto oo qiyaastii 35 KM u jira degmada Kuntuwaaray ee gobalka Shabeellaha Hoose
Telefishanka Qaranka DF ayaa sheegay in howlgalkaan uu dhacay xalay abaaro saddexdii habeenimo, waxaana lagu bartilmaamedsaday laba guri oo ay al-shabaab ku diyaarinayeen rag hubeysan iyo walxaha qarxa.
Waxaa sidoo kale la sheegay in howlgalkaas lagu burburiyey guryihii fariisinka u ahaa iyo wixii saanad ciidan ahaa ee ay halkaas ku diyaarinayeen.
“Howlgalkan ayaa qeyb ka ahaa burburinta kooxaha khawaarijta, iyadoo ciidanka Qaranka oo kaashanaya Shacabka Soomaaliyeed iyo Saaxiibada Caalamka ay ka go’an tahay sifaynta kooxdaasi” ayuu yiri sarkaal ka tirsan ciidanka xoogga dalka.
