Weerar qorsheysan oo ay iska kaashadeen ciidanka xoogag dalka iyo ciidamada Mareykanka ayaa saakay lagu qaaday fariisin ay Al Shabaab kaga sugnaayeen gobolka Galgaduud , gaar ahaan duleedka magaalada Galcad.
War kasoo baxay dowladda Soomaaliya laguna baahiyay telefishinka Qaranka ayaa lagu sheegay in weerarka ka dhacay meel qiyaastii 35km Koofur bari uga beegan Magaalada Galcad ee Gobolka Galgaduud.
Duqeynta ay fuliyeen diyaaradaha dagaalka dowladda Mareykanka ayaa lagu sheegay in lagu dilay 5-xubnood oo katirsan kooxda Al Shabaab , kuwaa oo ku sugnaa deegaanka duqeynta lala beegsaday lana sheegay in Al Shabaab isku abaabulayeen.
Diyaaradaha dagaalka Mareykanka ayaa kordhiyay duqeymaha ay la beegsanayaan fariisimaha kooxda Al Shabaab, maalmo kahor ayaana duqeymo khasaaro geestay lagu garaacay xarumo Al Shabaab ku lahaayeen degmada Galhareeri.
Duqeyntan ayaa imaaneysa xilli uu socdo abaabulkii ugu dambeeyay howlgalo la doonayo in Al Shabaab looga saaro bariga gobolka Galgaduud ,gaar ahaan degmooyinka Ceelbuur, Galhareeri iyo deegaannada hoostaga.
