Milateriga Niger ayaa sheegay inay maxkamadeyn doonaan Madaxweynihii xilka laga tuuray ee Mohamed Bazoum, iyadoo lagu ueedeynayo khiyaano qaran iyo inuu wax u dhimay amniga gudaha dalkaasi.
Afhayeen u hadlay millatariga Niger ayaa war qoraal ah oo laga sii daayey telefishinka dalkaai ku sheegay in eedaha loo heysto Bazoum ay yihiin kuwo la xiriira khiyaano qaran oo uu ka galay dadka iyo dalka.
Abdramane oo hadalkiisa sii wata ayaa dhaleeceeyay cunaqabataynta la saaray dalkiisa, isaga oo sheegay in talaabooyinka ay qaadeen dalalka Galbeedka Afrika ay dadka ku adkeyn doonto inay helaan dawooyin, cunto iyo koronto.
Ururka Galbeedka Afrika ayaa ansixiyay in dalka Niger loo diro ciidan heegan u ah soo celinta madaxweyne Bazoum iyo nidaamka dastuuriga ah ee dalkaasi, waxaana warku intaa raaciyay in dalalka Galbeedka Afrika ay weli ka go’an tahay in xal diblumaasiyadeed loo helo xiisadda ka taagan Niger.
Madaxweyne Bazoum oo 63 jir ah iyo qoyskiisa ayaa lagu hayaa guriga rasmiga ah ee madaxtooyada oo ku yaalla caasimadda Niamey tan iyo afgambigii dhacay 26-kii July.
