Taliska ciidanka booliiska qeybta gobolka Banaadir ayaa maanta soo bandhigtay nin lagu eedeeyay in qof shacab ah ku dilay degmada Hodan ee gobolka Banaadir, kaa oo dilka kaddib u baxsaday magaalada Kismaayo.
War kasoo baxay taliska booliiska gobolka Banaadir ayaa lagu sheegay in ninkan meel ku dhaw carwada Al Kowthar 4-tii bishan ku dilay qof shacab ah, waxaana ninkan gacanta ciidanka booliiska lagu soo wareejiyay maanta oo ah 13-ka bisha 8-aad.
Booliiska ayaa sheegay in xog ay heleen ku ogaadeen in gacan ku dhiiglaha uu joogo Kismaayo, waxa ayna xuseen in wada shaqeyn ay la sameeyeen booliiska Ksmaayo suurtogalisay in lasoo qabto eedeysanaha.
Ninkan dilka ku eedeysan ayaa hadda ku xiran saldhigga booliiska degmada Hodan, waxa ayna taliska booliiska sheegeen in loo gudbin doono maxkamadda ku shaqada leh si caddaaladda loo horgeeyo.
