Toogasho dad badan aad uga argagaxeen ayaa shalay oo Jimco aheyd ka dhacday degmadda Gradacac oo ku taalla waqooyi bari ee dalka Bosnia Herzegovina , waxaana toogashadan ninka geestay uu sameenayay tabin toos ah.
Ninkan oo magaciisa booliiska ku sheegeen Nermin Sulejmanovic oo 35 jir ahaa ayaa xillga uu dilayay xaaskiisi hore iyo dad kale sameenayay tabin toos ah barta bulshada kuwada xariirto ee Instagram.
War kasoo baxay booliiska Bosnia Herzegovina ayaa lagu sheegay in ninka hubeysan uu dilay xaaskiisi hore iyo sidoo kale aabe iyo wiil uu dhalay , waxa uu sidoo kale dhaawacay saddex qof oo kale uu ku jiro askari booliis.
Ninka toogashada geestay oo ahaa tababare jirdhis ayaa markii dambe isna is toogtay, lamana oga ilaa hadda waxa sababay toogashada uu ninkan geestay iyo waxa ku kalifay in dilkaasi si toos ah uga baahiyo barta Instagram.
Muuqaalada toos ah uu duubayay ninkan ayaa waxaa laga dhax arkay isagoo qori la soo baxay, kadibna rasaas huwiyey Haweeney la sheegay inay ahayd xaaskiisii hore, dhammaan muuqaaladii uu duubay ninkan ayaa laga saaray barta Instagram.
Ra’isul-wasaaraha Federalka Bosnia, Nermin Niksic ayaa si kulul u cambaareeyay toogashada uu geestay ninka hubeysan, waxa uuna tacsi u diray ehelada dadka la dilay, isagoo sheegay in uusan aqoon wax uu ku sifeeyo toogashadan arxankadaran.
