Wasiirka caddaaladda iyo arrimaha dastuurka XFS, mudane Xasan Macallim Maxamuud, ayaa magaalada Dhuusamareeb ka wada abaabulka duullaanka dowladdu ay horumuudka ka tahay ee lagu xoreynayo degmooyinka Ceelbuur ,Galhareeri iyo deegaannada hoostaga.
Xasan Macallim Maxamuud ayaa hoyga uu ka deganyahay magaalada Dhuusamareeb kula kulmay odayaasha dhaqanka, qaar kamid ah wasiirrada iyo xildhibaannada Gal-mudug ee kasoo jeeda beesha Murusade.
Kulanka ayaa qeyb ka ahaa kulamada joogtada ah ee wasiirku la yeelanayo qeybaha bulshada ayaa looga hadlayaa arrimo badan oo khuseeya xoreynta oo ay kamid tahay in dhammaan bulshadu ay wadajir uga qeyb qaadato howl-galka, si dadka deegaanku ay u gaaraan horumarka ay u baahanyihiin.
Madaxweynaha Soomaaliya iyo wasiirro katirsan xukuunadda Soomaaliya ayaa magaalada Dhuusomareeb u jooga abaabulka howlgal la doonayo in Al Shabaab looga saaro degnooyinka Galhareeri iyo Ceelbuur oo si buuxda ugu jira gacanta Al Shabaab.
Howl-galka qeybtiisa duqeynta cirka ah ayaa shalay bilaawday, waxaana la filayaa in duulaanka dhulka ah uu isna dhawaan bilaawdo.
