Guddoomiyaha Gobolka Banaadir Ahna Duqa Magaalada Muqdisho Mudane Yuusuf Xuseen Jimcaale (Madaale),ayaa Aqalka Dowladda Hoose ee Xamar ku qaabilay Xildhibaan Cabdullaahi Mohamed Cabdullaahi oo ka tirsan Golaha deegaanka Magaalada Gothenburg ee dalka Sweden.
Waxaa looga hadlay kulankan xiriirka Magaalooyinka Muqdisho iyo Gothenburg, Isdhaafsiga Aqoonta Golayaasha Deegaanka iyo tan Dowladdaha Hoose iyo sidii loogu shaqeyn lahaa Mataaneynta labada Magaalo.
Xildhibaan Cabdullaahi Maxamed Cabdullaahi oo martiqaad rasmi ah ka heysta Guddoomiyaha Gobolka Banaadir Ahna Duqa Magaalada Muqdisho, ayaa inta uu joogo Magaalada Muqdisho waxa uu la kulmi doonnaa qeybaha kala gedisan ee Maamulada Degmooyinka, Dhallinyarada iyo Wax-galka Bulshada Caasimadda.
Kulankan waxaa goobjoog ka ahaa Xoghayaha Guud ee Maamulka Gobolka Banaadir Mudane Feysal Caraale Afrax.
Cabdullaahi Maxamed oo ka tirsan Baarlamaanka Dalka Sweden ayaa ka mahadceliyay sida diiran ee loogu soo dhaweeyay Magaalada Muqdisho, wuxuuna bogaadiyey dedaalka xoogan ee maamulka gobolku ugu jiro horumarinta caasimada.
